49 ára gamli danin Allan Drost verður komandi tvey árini høvuðsvenjari hjá besta kvinnuliðnum og næstbesta mansliðnum hjá KÍ. Tað boðar KÍ frá.
Allan hevur drúgvar royndir í kvinnufótbólti, og hevur verið høvuðsvenjari hjá Kolding IF og FC Thy-Thisted Q, har hann vann steypakappingina í 2021. Hann hevur eisini verið U18 høvuðsvenjari hjá OB.
Frammanundan hevur Allan verið elituvenjari í Vejle BK og hjálparvenjari í Joinville EC í Brasil. Hann hevur hægstu venjaraútbúgvingina UEFA Pro-licens og UEFA Elite Youth A-útbúgvingina, sum er serliga viðkomandi fyri arbeiðið við ungu KÍ-arunum.
– Vit hava leitað eftir einum venjara við royndum og førleikum til at lyfta kvinnurnar upp aftur á ovastu rók og hjálpa ungu KÍ-arunum við at gerast klárir til Betrideildarfótbólt, sigur Jonas Nielsen, akademistjóri hjá KÍ.
Allan Drost flytur til Klaksvíkar fyrst í januar og gleðir seg til avbjóðingina.
– Vit skulu tora at droyma stórt og arbeiða hart og eyðmýkiliga, sigur hann.
Deil á Facebook
