Sjey hondbóltsdystir um vikuskiftið

Fult umfar er í bestu hondbóltsdeildunum hjá kvinnum og monnum í dag og í morgin.

Í kvinnudeildini eru spennandi dystir á skránni, tí tey ovastu fýra liðini spæla móti hvør øðrum, og tey niðasta fýra spæla móti hvør øðrum.

---

Leygardagin tekur Stjørnan móti VB í Klaksvík. Hetta er dystur millum tvey tey niðastu liðini í kappingini, og tí skuldi verið útlit fyri einum jøvnum dysti. Stjørnan hevur tó havt eina góða gongd í seinastuni og spældi seg víðari til hálvfinalunar í steypakappingi. Stjørnan má tí metast at vera best boðið upp á ein vinnara í hesum dystinum.

Leygarkvøldið taka kvinnurnar hjá StÍF móti EB á Skála. Her er púra opið, hvør fer at vinna.

Oddaliðið Kyndil tekur sunnudagin móti VÍF. Hóast lítið skilir liðini á stigatalvuni, so er Kyndil greiður favorittur, tí Kyndil hevur higartil vunnið allar dystirnar í landskappingini.

Í hinum dystinum sunnudagin taka hoyvíkskvinnur úr H71 móti Neistanum. H71 hevur higartil staðið seg betri enn Neistin, men nú landsliðsleikarin Bjørt Franksdóttir Joensen er aftur í Neistanum, er liðið vorðið nakað sterkari, og tí kann henda at ávísur spenningur verður í hesum dystinum

Hjá monnunum eru allir dystirnir klokkan 16.00 sunndagin.

Landskappingin hjá monnum er sera jøvn hetta kappingarárið, og bara Team Klaksvík er farið langt aftur um hini seks liðini.

Seks tey fremstu liðini spæla móti hvør øðrum sunndagin, og allir dystirnir eru púra opnir, og tað er nærum ómøguligt at gera nakran til favoritt fram um nakran annan.

Landskappingin er soleiðis skipað, at tey ovastu koma øll í FM-endaspælið, og tað tykist longu avgjørt at øll uttan Team Klakvík koma víðari. Tí sær út til, at liðini ikki leggja so nógv í, hvør er best beint nú, tí tað ræður um at verða so væl fyri sum møguligt, tá ið spælt verður um FM í apríl, og so eru nøkur lið, sum hugsað mest um at vera so væl fyri sum gjørligt til hálvfinalurnar í steypakappingini, sum verða í næstum.

Stigatalva SMS-deildin

Støðan	Dystir	Vunnin mál	Tapt mál	Munur	Stig
Kyndil	13	465	274	191	26
H71	13	445	344	101	21
VÍF	13	419	295	124	21
Neistin	13	339	322	17	15
StÍF	11	228	312	-84	6
EB	13	324	433	-109	5
Stjørnan	12	296	400	-104	4
VB	12	273	409	-136	2

Stigatalva Burndeildin

	Dystir	Vunnin mál	Tapt mál	Munur	Stig
StÍF	11	343	305	38	16
Kyndil	11	323	305	18	15
VÍF	11	358	312	46	14
H71	11	331	322	9	11
Neistin	11	289	282	7	11
KÍF	11	281	284	-3	11
Team Klaksvík	12	300	415	-115	0