Neistin vann á H71

Neistin stóð fyri ein einum heldur óvæntaðum úrsliti í bestu kvinnudeildini í hondbólti, tá ið tær vunnu móti H71.

Neistin hevur higartil í kappingarárinum ikki megnað at staðið Kyndli, H71 og VÍF kurl, men í dag vunnu tær so fyrstu stigini móti topp 3. Eitt óvæntað úrslt, og tó ikki, tí hjá H71 manglaði spælskiparin Maria Halsdóttir Weyhe, og tað sást aftur.

Liðini fylgdust fyrstu 20 minuttirnar, og H71 var eisini frammanfyri viðhvørt. Men beint fyri hálvleik eydnaðist Neistanum at leggja seg fram um, og í steðginum var 18-14 til Neistan.

Neistin økti beinanvegin í seinna hálvleiki, og málverjin, Yui Shibuya, nærum stongdi málið í longum løtum í seinna hálvleiki. H71 hevði millum annað serstakiliga trupult við at skora upp á brotskast, og fýra leikarar brendu fimm av seks brotskøstum í dystinum.

Eina løtu førdi Neistin við átta málum, og dysturin endaði 28-23 til Neistan.

Elsa Egholm skoraði seks ferðir fyri H71, og Bjørk F. Joensen skoraði sjey mál hjá Neistanum.

---

Kyndilskvinnur vunnu aftur greiðan sigur í dag, hóast mótstøðan var rímiliga sterk. VÍF á triðja plássi vitjaði í høllini Hálsi, og tær megnaðu bara at fylgja við Kyndli fyrsta korterið.

Kyndil var einfalt ov sterkt , og er eisini vorðið upp aftur betri mannað, tí landsliðsleikarin Natasja Hammer, sum í fjør spældi við StÍF, eg aftur í grøna búnanum.

Kyndil førdi 18-13 í hálvleikinum, og vann dystin 32-22.

Turið Samuelsen skoraði 10 mál fyri Kyndil, og Agnas Funn skoraði 6 ferðir fyri VÍF.

Stigatalva SMS-deildin

	Dystir	Vunnin mál	Tapt mál	Munur	Stig
Kyndil	14	497	296	201	28
H71	14	468	372	96	21
VÍF	14	441	327	114	21
Neistin	14	367	345	22	17
StÍF	12	256	336	-80	8
Stjørnan	13	329	418	-89	6
EB	14	348	461	-113	5
VB	13	291	442	-151	2