Í kvøld vóru tríggir dystir í millumbólki 2 í EM-endaspælinum í kvinnuhondbólti, og júst sum væntað tryggjaði Noreg sær pláss í hálvfinaluni við einum sigri á 32-27 móti Týsklandi.
Noregi legði eitt øgiligt trýst á frá byrjan, og týska verjan kláraði als ikki at standa í móti. Í hálvleikinum førdi Noreg 19-13, og dysturin var í veruleikanum avgjørdur. Noregi helt frástøðuna langt inn í seinna hálvleik, men nakrar minuttir fyri tíð kom Týskland niður á trý máls mun. Noreg hevði tó fult tamarhald og vann 32-27.
Danmark og Niðurlond kappast um seinna plássið í hálvfinalunum, og tey spæla avgerandi dyst móti hvør øðrum mikudagin kl. 17.00. Fyri Danmark er nóg mikið at spæla javnt móti Niðurlondum fyri at spæla seg í hálvfinaluna, sum verður móti Ungarn.
Í dag gjørdu Niðurlond fyrst sítt, tá ið tær vunnu lættliga 37-29 móti Sveis, sum fyrr í kappingina akkurát vann móti Føroyum.
Danmark mátti arbeiða eitt sindur meira fyri sigrinum móti Slovenia, sum striddist óvæntað væl allan fyrra hálvleik, og í steðginum var støðan 17-15 til Danmark.
Í seinna hálvleik sást tó, at munur er á londunum. Slovenia fylgdi við til 19-19, men so fór Danmark frá. Kendi málverjin hjá Danmark, Sandra Toft, sum júst er komin í hópin, eftir at hon í fyrsta umfari ikki slapp við, stóð væl, og Danmark vann dystin 33-26.
Úrslit sunnudagin í millumbólki 2:
Sveis – Niðurlond 29-37 (17-24)
Noreg – Týskland 32-27 (19-13)
Danmark – Slovenia 33-26 (17-15)
Stigatalva EM-millumbólkur 2
| D | V | J | T | Mál | Stig | ||
| 1 | Noreg | 4 | 4 | 0 | 0 | 123 – 98 | 8 |
| 2 | Danmark | 4 | 3 | 0 | 1 | 122 – 105 | 6 |
| 3 | Niðurlond | 4 | 3 | 0 | 1 | 113 – 104 | 6 |
| 4 | Slovenia | 4 | 1 | 0 | 3 | 108 – 117 | 2 |
| 5 | Týskland | 4 | 1 | 0 | 3 | 107 – 118 | 2 |
| 6 | Sveis | 4 | 0 | 0 | 4 | 111 – 142 | 0 |
Mynd: EHF
Deil á Facebook
