EM-hagtøl: Jana nógv upplegg, Annika bjargaði væl, og Turið rann skjótt

Nú søguliga EM-endaspælið í kvinnuhondbólti er av, er stuttligt at hyggja í tey ymisku hagtølini, sum verða gjørd um avrik hjá leikarum og liðum.

Verður hugt at yvirlitinum yvir, hvør leikari hevur lagt upp til flest mál, so sæst, at spælskiparin á føroyska landsliðnum, Jana Mittún hevur best miðaltal av øllum leikarum í EM.

Jana legði upp til 20 mál í trimum dystum, og gevur tað eitt miðaltal upp á 6,67 upplegg fyri hvønn dyst.

Niðanfyri sæst topp 5 listin:

	Land	Dystir	Mál lagt upp til	Miðal
Jana Mittún	Føroyar	3	20	6,67
Tjaša Stanko	Slovenia	7	41	5,86
Jamina Roberts	Svøríki	8	37	4,63
Dione Housheer	Niðurlond	8	35	4,38
Petra Vamos	Ungarn	9	39	4,33

Annika Fríðheim Petersen næstbest bjargingarprosent

Leingi hevði okkara málkvinna, Annika Fríheim Petersen, best bjargingarprosent, men hon endaði nummar tvey, um hugt verður eftir, hvussu stóran part av skotunum málkvinnurnar í EM bjargaðu.

Annika Fríðheim Petersen bjargaði 28 av 67 skotum, og tað er 41,79 prosent av skotunum. Einans triðja málkvinnan hjá Noregi, Maja Raasok hevði eitt betri bjargingarprosent. Hon bjargaði 48,89 prosent av øllum skotunum.

Málverjar við bestu bjargingarprosentum:

	Land	Dystir	Skot	Bjargingar	Prosent
Maja Raasok	Noreg	3	45	22	48,89
Annika Fríðheim Petersen	Føroyar	3	67	28	41,79
Kinga Janurik	Ungarn	3	46	19	41,3
Sabrina Novotná	Kekkia	3	107	42	39,25
Zsófi Szemerey	Ungarn	8	189	73	38,62
Hatadou Sako	Frakland	8	99	36	36,36
Silje Margaretha Solberg-Oesthassel	Noreg	9	174	63	36,21
Katharina Filter	Týskland	7	151	54	35,76
Althea Rebecca Reinhardt	Danmark	5	74	26	35,14
Laura Glauser	Frakland	9	206	73	35,44

Turið Arge Samuelsen rann triðskjótast

Eisini er tað hugtkandi, at Føroyar áttu triðskjótasta leikara í EM-endaspælinum. Turið Arge Samuelsen rann 28,55 km/tíman, tá ið hon rann skjótast. Einans Erika Rajnohová úr Slovakia og Mia Sofia Emmenegger úr Sveis runnu skjótari.

Listin yvir kvikastu leikarar sær soleiðis út:

	Land	Dystir	Km/tíman
Erika Rajnohová	Slovakia	3	30,24
Mia Sofia Emmenegger	Sveis	7	29,05
Turid Arge Samuelsen	Føroyar	3	28,55
Bo van Wetering	Niðurlond	8	28,44
Adrianna Górna	Pólland	6	28,4