Bjørn Basberg er Professari emeritus á Norges Handelshøyskole í Bergen. Hansara granskingarøki hevur serliga verið tøkni- og maritimsøga, og serligan áhuga hevur hann fyri hvalaveiðin og búskaparligu søguni í økjunum við Antarktis.
Bjørn Basberg er virkin í arbeiðinum at granska og varðveita ídnaðararvin á Suðurgeorgia. Hann er stýrislimur í South Georgia Heritage Trust og limur í Heritage Advisory Panel fyri Suður Georgia.
Tjóðsavnið hevur bjóðað Bjørn Basberg til Føroya, í samband við arbeiðið, sum savnið ger á Hvalastøðini við Áir. Hvalastøðin við Áir er nevnliga av sama slagi, sum ein av hvalastøðunum á Suður Georgia.
Fyrilesturin verður í hølum Tjóðsavnsins í Brekkutúni 6 í Hoyvík.
Fyriskiparnir siga, at tað er ókeypis atgongd og øll eru hjartaliga væl komin.
Føroyingar hava altíð havt hug at royna fjarar leiðir at vinna lívsins breyð. Hetta sæst millum annað í okkara royndum við stórhvalaveiðu í Suðuríshavinum. Í bók síni um Lopra og hvalastøðirnar har, greiðir Erling Poulsen frá royndum, sum norðmenn gjørdu við hvalaveiðu á hesum leiðum fyrst í hini øldini saman við føroyskum íleggjarum.
Millum annað er frásøgn um Thomas Jacobsen av Skipanesi. Hann fór í 1913 til Suðurgeorgia at arbeiða á eini hvalastøð, og har hitti hann millum annað kenda pólgranskaran Sir Ernest Shackleton. Thomas arbeiddi umborð á skipi hansara “Endurance”, og har komu teir at kennast (Mynd: Google Maps)
Deil á Facebook
