Høgni Hoydal landstýrismaður í vinnumálum hevur lagt uppskot fyri Løgtingi um at broyta løgtingslógina um fuglaveiðu.
Endamálið er at stytta veiðitíðina fyri lunda, lomviga, álku og skarv fyri at verja minkandi stovnarnar. Nýggja veiðitíðin verður frá 20. oktobur til 31. desembur, og fyri skarv endar hon 30. novembur.
Henda broyting skal gera tað lættari at byggja upp og verja serliga lunda- og lomvigastovnin í Føroyum. Teljingar vísa, at lomvigastovnurin er minkaður heilar 70 prosent síðan 1972, og lundastovnurin er eisini nógv minkaður.
Lundi er í Evropa skrásettur sum hótt fuglaslag, so hetta uppskotið er eitt stig til at varðveita stovnarnar.
Øll veiða skal nú fráboðast Havstovuni, sum almannakunnger veiðihagtølini á hvørjum ári. Hetta skal tryggja betri eftirlit og gera veiðuna burðardygga.
Uttanríkis- og vinnumálaráðið sigur, at lógaruppskotið fylgir altjóða sáttmálum sum Ramsar-sáttmálanum. Broytingarnar hava ikki fíggjarligar ella umsitingarligar avleiðingar fyri land og kommunur, men verða mett at hava góðar avleiðingar fyri náttúruna og umhvørvið.
Endamálið er at tryggja, at sjófuglur í Føroyum ikki minkar enn meira, og at siðbundna veiðan kann halda fram á ein burðardyggan hátt.
Deil á Facebook
