Tingmaðurin Steffan Klein Poulsen (Miðfl.) hevur í løgtinginum spurt landsstýriskvinnuna í umhvørvismálum Ingilín D. Strøm um viðurskifti kring rættindi og pening í sambandi við sjóvarfalsorku verkætlanina hjá Minesto og SEV.
Løgtingsmaðurin vildi vita hvør ið hevur ræðisrættin á data frá verkætlanini og um hvørji møgulig gjøld verða tikin frá tí svensku fyritøkuni fyri at brúka føroyskt sjóøki.
“Hvør eigur og tískil umsitur vitanina (hagtøl, data v.m.) sum koma til høldar frá verkætlanini sum SEV og Minesto varða av?” spurdi Steffan Klein Poulsen.
“Rindar Minesto tilfeingisgjald ella líknandi gjald fyri atgongd til føroyska tilfeingið?” spurdi hann víðari.
“Fær SEV lut í einum møguligum fíggjarligum yvirskoti um so er at verkætlanin gerst vinnulig?” ljóðaði hansara triði spurningur til umhvørvismálaráðharran.
“Hvussu langa tíð fevnir royndartíðin millum SEV og Minesto um?” spurdi hann víðari.
“Kunnu aðrar sjóvarfalsverkætlanir, útlendskar ella føroyskar, roynast í Føroyum í tíðarskeiðum Minesto er virkið í Føroyum?” spurdi tingmaðurin somuleiðis.
Hann hevði síðan ein sætta spurning um evnið: “Hvussu leingi hevur SEV bundið seg til at keypa streym frá Minesto og til hvønn prís?”
Deil á Facebook
